Së fundmi, amerikanët kanë arritur që t’i heqin nga dora Rusisë një armë që në jo pak raste i ka vënë në vështirësi, madje duke marrë edhe jetën e disa ushtarëve.
Gjithçka ka ndodhur përmes një misioni sekret amerikan në Afrikë.
Misioni u realizua në një nga zonat më të rrezikshme në botë, në Libi, e ndarë në disa grupe të ndryshme, në luftë mes tyre, pas rënies së diktatorit Gheddafi.
Një nga palët, ajo e gjeneralit Haftar, që kontrollon pjesën lindore të vendit, në vitin 2019 mori një ndihmë ushtarake të madhe nga Emiratet e Bashkuara, dhe ndër to edhe sistemin kundërajror të lëvizshëm rus Pantsir S-1.
Fillimisht trajnuesit e sistemit të avancuar, të përbërë edhe nga raketa ajër-ajër, ishin nga Emiratet, por më pas u zëvendësuan nga disa nga mercenarët më të përgatitur në botë, ato të kompanisë ruse Vagner. Mercenarët korrën suksese të mëdha për Haftarin, duke shkatërruar edhe disa drone amerikane dhe italiane që patrullonin fshehurazi. Por kur mercenarët rusë u tërhoqën papritur, në pranverën e vitit të kaluar, disa nga këto armë mbetën në terren, të shkatërruar nga dronët turq në mbështetje të presidentit Serraj.
Aty filloi misioni për marrjen nën kontroll të kësaj arme, që i ka kushtuar forcave amerikane humbje të tjera edhe në Siri, falë sistemit të shënjestrimit automatik të armiqve.
Forcat e Tripolit, rivale të Haftar, arritën të parët të vendosin duart mbi armën ruse, por më pas ajo fluturoi me anë të një avioni C-20 drejt Europës dhe më pas në Shtetet e Bashkuara, për të studiuar teknologjinë saj dhe mënyrën për ta neutralizuar.
Rusët, nga ana tjetër, nuk duken tejet të shqetësuar, duke nënvizuar se sistemet që i kishin dhënë Emirateve, dhe që përfunduan në Libi, nuk përfaqësonin gjeneratën më të re të Pantsir S-1.
Ndërkohë, analistë amerikanë mendojnë se ngjarja doli sot në pah më së shumti për të ulur reputacionin e ushtrisë të Emirateve, me të cilën administrata e re Biden nuk duket se ka një marrëdhënie të mirë.
Një nga vendimet e para të Shtëpisë së Bardhë nën demokratin ka qenë pikërisht anulimi i një kontrate të majme me Emiratet e Bashkuara, shumë e shtyrë nga Trump, që parashikonte furnizimin e vendit arab me avionët F-35, nga më të avancuarit në botë.
