Prokuroria e Tiranës ka kërkuar për ish-gjyqtarin e Gjykatës së Tiranës, Ibrahim Hoxha, i akuzuar për “korrupsion pasiv”, tre vite burg, gjatë dhënies së pretencës sot në Gjykatën e Krimeve të Rënda.
Ish -gjyqtari akuzohet se ka marrë 600 mijë lekë të reja nga një person për të dhënë vendim gjyqësor në favor të tij. Bashkë me Hoxhën, janë marrë të pandehur djali i tij, Lejdon Hoxha si dhe Dritan Jazexhiu, i cili ishte personi që kërkonte të korruptonte gjyqtarin, si dhe Novruz Gajdja i cili luajti rolin e ndërmjetësit. “Në vijim të veprimeve hetimore, Prokuroria për Krime të Rënda ka zbuluar se gjyqtari Hoxha ka kërkuar shumën 800 mijë lekë të reja, për të dhënë vendimin në favor të Dritan Jazexhiut. Sipas hetimit, është provuar se të pandehurit kishin rënë dakord që pjesa e parë e parave, prej 600 mijë lekë, të jepeshin një ditë para vendimit. Pjesa e mbetur e parave, 200 mijë lekë, do të jepeshin pas dhënies së vendimit”, tuhet në dosjen e Prokurorisë. Gjyqtari i Gjykatës së Tiranës, Ibrahim Hoxha u arrestua mbrëmjen e 2 majit 2016 së bashku me djalin e tij dhe më 3 maj, KLD e pezulloi nga detyra.
