Eloida Goxhi dhe Moisi Duda do të jenë anëtarët e rinj të KLP-së, duke plotësuar vakancën pas largimit të Besnik Canit dhe Arben Dollapaj.
Prokurorja Eloida Goxhi u zgjodh anëtare e KLP me 104 vota pro, duke zëvendësuar ish-anëtarin Besnik Cani.
Ndërkohë Moisi Duda, prokuror i Apelit, mori automatikisht vendin e Arben Dollapajt, pasi ishte kandidatura e vetme që konkuronte nga rradhët e prokurorëve të Apelit.
Për vendin e mbetur vakant pas largimit të Besnik Canit konkuronin Zeqir Hoda, prokuror, Prokuroria pranë Gjykatës së Shkallës së Parë, Tiranë; Eloida Goxhi, prokuror, Prokuroria pranë Gjykatës së Shkallës së Parë, Berat; Albert Kuliçi, prokuror, Prokuroria pranë Gjykatës së Shkallës së Parë, Vlorë; Elona Alvora, prokurore, Prokuroria pranë Gjykatës së Shkallës së Parë, Vlorë.
Për katër kandidatët nga prokuroritë e shkallëve të para votuan gjithsej 257 prokurorë, nga rezultuan 8 fletë votimi të pavlefshme. Prokurorja e Beratit, Eloida Goxhi siguroi 104 vota, Zeqir Hoda 91 vota, Albert Kuliçi 45 vota dhe Elona Alvora 9 vota.
Prokurori i Apelit Durrës, Moisi Duda si kandidat i vetëm nga prokuroritë e apelit siguroi 238 vota, ndërsa 19 të tjera rezultuan të pavlefshme.
Dy kandidatët e zgjedhur si anëtarë të rinj të KLP-së, Eloida Goxhi dhe Moisi Duda e kanë kaluar vetingun me formë të prerë, pasi Komisioneri Publik i konsideroi të drejta vendimet e Komisionit të Pavarur të Kualifikimit, KPK për konfirmimin e tyre në detyrë.
