Partia Demokratike prezanton të enjten programin e saj elektoral, ndërsa sot shtyllat kryesore të këtij programi, kapitulli ekonomik, iu prezantua përmes platformës online anëtarëve të Këshillit Kombëtar.
Programi elektoral i PD, kryesisht në pjesën ekonomike, pritet të prezantohet nga Alffred Rushaj, Florjon Mima dhe Jorida Tabaku, që mësohet se kanë drejtuar grupin e punës lidhur me hartimin e kësaj pjese të programit.
Referuar programit në pjesën ekonomike, Partia Demokratike do të vendosë një rregull të ri në momentin që vjen në pushtet; taksat përcaktohen në vitin e parë të qeverisjes dhe nuk ndryshojnë më deri në fund të mandatit.
Partia Demokratike e ka bere të qartë se beson tek taksa e sheshtë, e cila do të jetë në nivelin 9%. PD synon që të thjeshtojë çdo procedurë dhe të heqë çdo barrierë për të ndihmuar biznesin.
Programi i Partise Demokratike ka përllogaritur koston për çdo premtim dhe efektin e çdo takse. PD synon që në fund të mandatit qeverisës të ketë hapur 110 mijë vende të reja pune dhe rritja ekonomike e Shqipërisë të jetë 5.5%.
Sipas burimeve nga PD, objektivi kryesor i programit është dyfishimi i të ardhurave për frymë, si reduktimi me 50 % i treguesve të varfërisë.
