Viti 2020 u mbyll me një bilanc prej 61 milionë eurosh dëme të paguara bruto nga ana e kompanive të sigurimit. Të dhënat zyrtare të Autoritetit të Mbikëqyrjes Financiare tregojnë se pagesa e dëmeve u rrit me 18.55 për qind në raport me vitin 2019. Efektin më të madh në këtë rritje e ka pasur pjesa e kompensimit për dëmet e shkaktuara në pronë nga tërmeti i 26 nëntorit 2019 ndërkohë që dëmet për sigurimin motorik kanë qenë tradicionalisht udhëheqës. Sipas AMF të ndara sipas klasave pjesa më e madhe e dëmeve të paguara bruto i përket sigurimit nga Sigurimi Motorik me rreth 3,390 milionë lekë, apo 44.84% të totalit të dëmeve të paguara bruto.
Në vitin 2020 të ardhurat nga primet e shkruara bruto të sigurimit kapën vlerën mbi 16,608 milionë lekë, ose 5.73% më pak se viti 2019. Gjatë vitit 2020, numri i kontratave të sigurimit të lidhura arriti në 956,447 me një ulje prej 29.16% krahasuar me vitin 2019.
“Tregu vazhdoi të mbetet sërish i orientuar tek sigurimet e Jo-Jetës, të cilat sollën 92.93% të vëllimit të përgjithshëm të primeve, duke i lënë përkatësisht sigurimet e Jetës me 7.02%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 36.18% dhe primet e shkruara bruto të sigurimit të detyrueshëm zënë 63.82% të totalit të tregut.
Sigurimi i Detyrueshëm Motorik
AMF raportoi se primet e sigurimit të detyrueshëm motorik, gjatë vitit 2020 arritën rreth 10,600 milionë lekë, ose 5.55 % më pak se viti 2019.
“Produkti MTPL e brendshme, gjatë vitit 2020, pati një rritje prej 4.00% të volumit të primeve të shkruara bruto. Kjo u shoqërua edhe me një rritje të numrit të kontratave prej 5.80% krahasuar me vitin 2019.
Produkti Karton Jeshil gjatë vitit 2020, pati një ulje prej 41.76% të volumit të primeve të shkruara bruto. Kjo u shoqërua nga një ulje të numrit të kontratave prej 60.24% krahasuar me vitin 2019.
Produkti Sigurim Kufitar, gjatë vitit 2020, pati një ulje 55.47% të volumit të primeve të shkruara bruto krahasuar me vitin 2019. Edhe numri i kontratave u ul me 63.28%” thuhet në njoftim.
Sigurimi Vullnetar
“Primet e sigurimit vullnetar, gjatë vitit 2020 arritën rreth 6,008 milionë lekë, 6.06% më pak se viti 2019. Numri i kontratave të sigurimit vullnetar u ul me 43.80% krahasuar vitin 2019. Primet e sigurimit vullnetar të Jo-Jetës gjatë vitit 2020, patën ulje me 5.50% kundrejt vitit 2019.
Në portofolat e Pronës, Përgjegjësive, Garancive të cilat gjatë vitit 2020 siguruan mbi 2,790 milionë lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 59.62%, të pasuara nga sigurimi i Përgjegjësisë së Përgjithshme me 30.76% të totalit.
Në portofolin sigurimi nga Zjarri dhe Forcat e Natyrës, gjatë vitit 2020, vihet re një ulje prej 5.08% e volumit të primeve të shkruara bruto të këtij portofoli dhe një rritje me 3.98% e numrit të kontratave të sigurimit, krahasuar vitin 2019” vlerëson AMF./Monitor/
