Reshjet e dendura të shiut gjatë mbrëmjes së djeshme kanë sjellë problematika në disa zona.
Reshjet kanë dëmtuar rrugën Vlorë-Orikum në zonën e Jonufrit, ku aktualisht kalohet vetëm në një sens. Kapiteneria e Vlorës ka njoftuar se për shkak të parashikimit të motit gjatë 48 orëve të ardhshme janë pezulluar mjetet e vogla lundruese dhe ato të peshkimit.
Shtimi i reshje ka sjellë edhe daljen e lumit Ishëm nga shtrati duke shkaktuar përmbytje në disa fshatra të Fushë-Krujës. Raportohet se përmbytje ka pasur në fshatin Bilaj, Mallkuç dhe Murqinë.
Situatë e rënduar paraqitet në lagjen “Erzen” në Shijak, ku katett e para të shtëpive e biznese janë në pushtetin e ujit.
Reshjet e vazhdueshme të shiut të ditëve të fundit kanë shkaktuar përmbytje edhe në Kurbin. Në fshatin Gjorem, sipërfaqe të tokave bujqësore ndodhen nën ujë.
Ndërkohë, si pasojë e motit të keq është shtyrë nisja e trageteve nga Bari në portin e Durrësit dhe anasjelltas. Në lumin Drin e Mat janë rritur prurjet, por nga sa raportohet deri tani nuk përbëjnë rrezik për të dali nga shtrati.
Në Lezhë, problem është furnizimin me energji elektrike.
Ndërsa në Finiq, një urë e kanalit ujitës është ndarë në dysh.
Rrëshqitjet e dheut kanë sjellë probleme në një pallat pesëkatësh në lagjen “Punëtori” në Gjirokastër. Problemet vijnë si shkak i rrëshqitjes së dheut disa metra ndërkohë që është çarë edhe betoni i rrugës.
Rrëshqitje dherash ka pasur edhe në aksin Tepelenë-Gjirokastër në vendin e quajtur Ura e Leklit.
Ndërkohë, në Korçë, ka pasur reshje shiu dhe bore në zonat malore në lartësinë mbi 1200 m, të shoqëruara edhe me erë të fortë. Mësohet se në rrugën e Dardhës trashësia e borës varion nga 5 cm në 15 cm. Ndërkohë mjetet e borëpastruese po punojnë për pastrimin e rrugëve dhe kriposjen e tyre. Kalimi i mjeteve nga km 6 – 12 rekomandohen me zinxhirë ose goma dimërore për mjete e vogla në orët e paradites.
