Mbrojtësi i Milanit, Andrea Conti, nuk është më pjesë e kuqezinjve për këtë sezon. Italiani do t’i bashkohet klubit të Parmës në formën e huazimit.
Ka qenë vetë klubi milanez që e ka konfirmuar lajmin përmes një deklarate zyrtare. Njoftohet se 26-vjeçari do të kalojë në “Ennio Tardini” në formë huazimi, por mund të bëhet më pas e përhershme nëse plotësohen disa kritere.
Mbrojtësi i krahut të djathtë u transferua me shumë bujë në Milano verën e vitit 2017 nga Atalanta, por nuk arriti dot të tregonte vlerat e tij për shkak të dëmtimve të shumta që kaloi. Këtë sezon ai numëron vetëm tre paraqitje në formacionin e Piolit dhe kjo është arsyeja se pse u largua nga “San Siro”.
