Joe Biden betohet sot si presidenti i 46-të i Shteteve të Bashkuara, duke marrë në duar frerët e një vendi të shënjuar nga ndasitë politike, lëngimi ekonomik dhe pandemia e pandalshme. Zëvendëspresidentja e zgjedhur, Kamala Harris, do të bëjë betimin krah tij në Uashington DC, i cili është fortifikuar mes frikës së trazirave. Rreth 25 mijë trupa të gardës kombëtare do të angazhohen për të garantuar sigurinë gjatë ceremonisë së inaugurimit, pas trazirave vdekjeprurëse në Kapitol, më herët gjatë muajit.
78-vjeçari, i cili do të bëhet presidenti më i moshuar në histori, do të bëjë betimin para kreut të gjykatës së lartë, John Roberts. Për shkak të masave anti-covid, eventit do t’i mungojnë turmat brohoritëse që marrin pjesë zakonisht në inaugurim.
Nga 200 mijë ftesa që u shpërndahen zakonisht pjesëtarëve të kongresit, këtë vit secilit prej tyre u janë dhënë vetëm dy. Mes të pranishmëve do të jenë tre ish-presidentë, Barak Obama, Bill Clinton dhe George Bush. Edhe zv.presidenti në largim, Mike Pence, do të marrë pjesë në ceremoni, duke munguar në lamtumirën e presidentit Trump në një bazë ushtarake jashtë kryeqytetit. Bashkëpunëtorë të Biden, thonë se ai do të shfrytëzojë fjalimin rreth gjysmë orë pas betimit, për të përcjellë një thirrje optimiste për unitet kombëtar, pas presidencës së trazuar të paraardhësit të tij.
Gjatë eventit do të përformojnë tre artistë; Lady Gaga, e cila do të këndojë himnin kombëtar, Jennifer Lopez dhe Garth Brooks. Më vonë, Tom Hanks do të drejtojë një koncert, në memorialin Lincoln, ku do të marrin pjesë Springsteen, John Legend, Jon Bon Jovi, Justin Timberlake dhe Demi Lovato.
Biden kishte planifikuar të mbërrinte me tren në Uashington, nga Uilmington, ashtu siç kishte bërë shpesh gjatë viteve si senator. Por, për shkak të shqetësimeve të sigurisë, u këshillua të udhëtonte me një avion privat.
Biden nuk i përmbajti dot lotët gjatë fjalimit të mbajtur në Uilmington, para se të largohej drejt Uashingtonit ku do të qëndrojë gjatë 4 viteve të ardhshme. “Kur të vdes, Delawaredo të jetë i shkruar në zemrën time”, tha ai.
Më vonë, mbrëmjen e së martës, ai dhe zëvendëspresidentja Harris u bënë homazhe 400 mijë amerikanëve që kanë humbur jetën nga covid-19, pranë memorialit Linkoln.
