Më 11 janar Shqipëria filloi vaksinimin kundër covid-19 ku ndër të parët që morën vaksinën ishte kryeministri i vendit, Edi Rama dhe mjekja, Najada Çomo. Këtë javë duke u bazuar te kontrata e nënshkruar me kompaninë Pfizer pritet që në Shqipëri të vijë një sasi prej 10 mijë dozash ku do të vaksinohen 5 mijë persona të cilët do të jenë mjekët, të moshuarit në azile dhe personat mbi 75 vjeç.
E ftuar mëngjesin e sotëm në emisionin “Ditë e Re” në RTV Ora ishte Kryetarja e Federatës së Mjekëve në Europë, mjekja shqiptare që punon në Gjermani, Aurora Dollenberg .
Ajo ka bërë me dije se ajo dhe të gjithë mjekët e Federatës po negociojnë me BE që Shqipëria të marrë të gjitha vaksinat e nevojshme për të vaksinuar popullatën kundër Covid-19.
Dollenberg shtoi se ata janë duke shprehur shqetësimin e tyre pasi Shqipëria si një vend me të ardhura të ulëta mund të mbetet në fund të listës ose mund të rrezikojë të mbetet dhe pa vaksinë.
“Ne jemi duke negociuar në këto momente së bashku me të gjithë mjekët që jemi në Federatë se si të ndërtojmë një mënyrë ose strategji që të bëjmë atë presionin e nevojshëm qoftë si akademikë apo si qytetarë europianë ndaj BE që Shqipëria dhe trojet shqiptare të vaksinohen. Ne po bëjmë ato hapat e para që të tregojmë prezencën dhe shqetësimin që kemi që Shqipëria si një vend me të ardhura më të vogla, mund të mbetet jo në fund të listës dhe është një rrezik i madh që mund të mbetet pa vaksinë fare ose të vaksinohet vetëm një përqindje kaq e ulët e popullsisë. 5000 persona është një shifër mjaft e ulët e popullatës dhe pandemia më pas mund të vazhdojë me vite të tëra”– thotë ajo.
