Sulmuesi i Partizanit, Theophilius Solomon ka paralajmëruar Tiranën para derbit. Shtatëlarti ka folur për Supersport, duke kërkuar gol përballë bardhebluve kampion të Shqipërisë.
Derbi i kryeqytetit vlen për javën e 15-të të Superligës dhe luhet të enjte në 18:00. Solomon tregon se nuk ka rëndësi pozicioni ku luan, teksa kërkon të ndihmojë me çdo kusht “Demat” për titullin kampion.
“Është një ndeshje e madhe, nuk është si ndeshjet e tjera, është një takim shumë i rëndësishëm për lojtarët, trajnerin dhe tifozët. Nëse fitojmë do të jetë një hap i rëndësishëm përpara për ne, do të jetë një dozë e madhe morali.
Uroj dhe shpresoj të shënoj, një nga dëshirat që shpreha për ditëlindje ishte pikërisht kjo, të shënoj në derbi. Do të bëj maksimumin për ta kthyer dëshirën në realitet.
Të gjithë kanë sakrifikuar për të mirën e skuadrës. Nuk është fare me rëndësi vendi ku unë parapëlqej të luaj, rëndësi ka pozicioni ku unë i duhem më shumë ekipit. Të jem i sinqertë nëse ja dal të gjej golin, nuk më intereson fare në çfarë roli më vendos trajneri.
Ne po bëjmë maksimumin tonë, nuk ka qenë e thjeshtë sepse nuk na u lejua të kishim përforcime në fillim të sezonit, por jemi munduar të japim më të mirën. Shpresojmë që çdo gjë të shkojë mirë deri në fund.
Dëshirojmë që në mbyllje të sezonit të gjithë të jenë krenar me ne dhe shpresoj të shpallemi kampion. Ne besojmë që mund t’ia dalim, në futboll gjithçka mund të ndodhë”, tha Solomon.
