Nga BoldNews.al
Ministria e Shëndetësisë është kthyer në një “minierë ari” për firmat farmaceutike. Kryeministri Edi Rama i ka dhënë dorë të lirë ministres Ogerta Manastirliu për shëndetësinë. Por, sa efektive kanë qenë tenderat në këtë sektor? Përgjigjen e kemi marrë pas skandaleve të njëpasnjëshme në shëndetësi, aq më tepër në spitalet Covid. Manastirliu ka firmosur gjatë kësaj kohe dokumente tenderësh me vlerë mbi 100 milionë euro. Dhe, shumica e procedurave ka qenë e dyshimtë; fitues pa garë, marrëveshje mes firmave që marrin të gjithë vlerën e akorduar.
Një tender të tillë do të denoncojmë sërish. Boldnews ka siguruar dokumentet e një procedure të kryer nga Ministria e Shëndetësisë, ku fitues ka dalë kompania “OES DISTRIMED”, firmë e cila edhe më parë ka fituar tendera miliona euro në këtë institucion.
Po le të analizojmë se çfarë ka ndodhur në këtë tender. Ministrja Manastirliu ka hapur një tender me objekt “blerje materiale mjekimi për shërbimin e hemodinamikës për nevoja të QSUT, SUSN, Spitalit Rajonal Shkodër dhe Spitalit Rajonal Fier”. Bëhet fjalë për lotin 1, “set për përgatitjen për koronarografins angioplastike” me fond 104.480.250 pa TVSH (me TVSH 1 milionë euro).
Në tender kanë marrë pjesë dy firma. E para, BIOMETRIC ALBANIA, e cila ka qenë fiktivisht në këtë tender, pasi nuk ka paraqitur ofertë ekonomike. Pra, vetëm ka dorëzuar letrat për ta bërë tenderin të ligjshëm nga ana proceduriale. Ndërkohë, në tender ka qenë edhe bashkimi i operatorëve ekonomilë O.E.S DISTRIMED dhe MONTAL Sh.p.k me vlerë oferte 102.929.000 lekë, pra vetëm disa milionë lekë të vjetra poshtë vlerës së ministrisë.
Normalisht, u s’kualifikua BIOMETRIC ALBANIA që s’kishte ofertë ekonomike dhe u shpall fituese OES DISTRIMED dhe MONTAL. Tenderi ka qenë pa garë dhe fituesi ka marrë pothuajse të gjithë vlerën e akorduar nga ministria.
Procedurat janë bërë fiktive, duke favorizuar kompaninë që edhe më parë ka fituar në mënyrë të dyshimtë dhjetëra tender nga Ministria e Shëndetësisë.
Boldnews ka denoncuar edhe më parë procedurat e ndjekura nga Ministria e Shëndetësisë, e cila i ka dhënë OES DISTRIMED dhjetëra milionë euro pa garë.
