Kryetari i PD-së, Lulzim Basha, përmes një postimi në rrjetet sociale ka kujtuar politikanin e njohur Pjetër Arbnori.
Basha shprehet se Arbnori ishte politikan i rrallë që nuk bëri kompromis asnjëherë me të keqen.
“Siç thoshte vetë Mandela i Ballkanit, qëndresën ja kishte edukuar familja, shkolla, leximet dhe eksperienca e gjatë e miqve të burgut politik. Frika, zilia dhe tundimi për privilegje, sipas tij ishin rrugët që na bashkojnë me të keqen. Dhe gjatë gjithë jetës së tij, në rini si desident e më vonë si deputet dhe drejtues i parlamentit, Pjetër Arbnori i tejkaloi me sukses këto sfida, duke u shndërruar në politikanin model ku mllefi dhe hakmarrja për kundërshtarin politik nuk gjeti kurrë vend”, shkruan Basha.
Arbnori sot do të mbushte 85 vjeç dhe për vite me rradhë ishte një nga figurat qendrore të PD-së. Ai drejtoi për 5 vjet Parlamentin e Shqipërisë, ndërsa mbahet mend për grevën e urisë që zhvilloi në makinën e tij para godinës së RTSH në vitin 1998, kohë kur opozitës nuk i transmetohej në median shtetërore asnjë aktivitet. Më pas Kuvendi u detyrua që të miratonte disa ndryshime ligjore që u njohën si amendamentet Arbnori.
Postimi i kryetarit të PD-së Lulzim Basha:
Dua të kujtoj sot me nderim të veçantë ditëlindjen e Pjetër Arbnorit, politikanit, shkrimtarit, përkthyesit dhe humanistit të madh që kaloi 28 vite të rinisë së tij në burgjet famëkeqe të komunizmit. Pjetër Arbnori i përkiste një plejade politikanësh të rrallë, të cilët nuk bënë kurrë kompromis me të keqen, që nuk u epën para presioneve apo privilegjeve. Që deri ditën e fundit luftuan dhe u përpoqën për idealet e tyre pavarësisht vështirësive të kohës.
Siç thoshte vetë Mandela i Ballkanit, qëndresën ja kishte edukuar familja, shkolla, leximet dhe eksperienca e gjatë e miqve të burgut politik. Frika, zilia dhe tundimi për privilegje, sipas tij ishin rrugët që na bashkojnë me të keqen. Dhe gjatë gjithë jetës së tij, në rini si desident e më vonë si deputet dhe drejtues i parlamentit, Pjetër Arbnori i tejkaloi me sukses këto sfida, duke u shndërruar në politikanin model ku mllefi dhe hakmarrja për kundërshtarin politik nuk gjeti kurrë vend.
Le ta nderojmë sot Pjetër Arbnorin, gjurmët e pashlyera të tij në historinë e Shqipërisë me urimin dhe shpresën se vlerat që ai solli në politikën shqiptare do të trashëgohen dhe nga brezat e rinj të politikës.
