Deputeti Ben Blushi deklaroi në “Të paekspozuarit” Ylli Rakipit në “News24” se nuk besoi tek fitorja e Donald Trump deri në momentin e fundit.
“Jo nuk kam besuar deri në fund. Më duket e habitshme, ishim mësuar me Clinton si profesioniste, ka qënë Sekretare Shteti, senatore dhe për shkak të figurës kontroverse të Trump”, tha Blushi,
Deputeti më tej shprehu habinë se si të varfrit e Amerikës kanë zgjedhur ta votojnë atë.
Kryetari i LIBRA-s, Ben Blushi tha ndër të tjera se e kishte të pamundur të parashikonte pasojat e fitores së Trump duke u nisur nga deklaratat e këtij të fundit në fushatë.
“E kam të pamundur të kuptoj se çfarë do t’i sjellë Amerikës fitorja e tij, por dhe çfarë pasojash do ketë për pjesën tjetër të botës. Premtimet e tij ishin paradoksale, premtoi ulje taksash edhe për të pasurit edhe për të varfrit. Nuk e di nëse Amerikan nën drejtimin e Trump do jetë më e dobët, më pak e përfillur, nëse do ketë një valë të re terrorizmi, nëse do zbusë marrëdhëniet me Rusinë, apo di t’i ashpërsojë me Kinën”, tha deputeti.
Blushi më tej, tha se më shumë se sa Trump ka fituar nevoja e amerikanëve për t’u ndjerë të mbrojtur. “Amerikanët janë të lodhur nga valët e emigrantëve që vijnë nga Meksika, besojnë që ju sjellin drogë, prostitucion”.
Më tej ai tha se zgjedhja e Trump vjen si pasojë e revoltës popullore ndaj pabarazisë dhe është e ngjashme me “Brexit” në Britaninë e Madhe.
