Alarmi për sulm terrorist, që çoi në zhvendosjen e ndeshjes Shqipëri-Izrael nga Shkodra në “Elbasan Arena”, ka mobilizuar strukturat e sigurisë në vend. Për të garantuar që gjithçka do të shkojë pa probleme, policia ka angazhuar rreth 1000 forca në gatishmëri për takimin e të shtunës mbrëma.
Prej të martës, kur u vendos që ndeshja do të luhej në Elbasan, stadiumi është marrë në dorëzim nga policia prej dy ditësh, ndërsa në hyrje të tij ushtrohen kontrolle ndaj çdo personi që shkel impiantin, qoftë edhe punëtorë apo punonjës të federatës.
Mësohet se inspektime të vazhdueshme në “Elbasan Arena” janë zhvilluar prej ditësh edhe nga një grup i huaj, i cili, siç konfirmohet nga burime të policisë, u përket shërbimeve inteligjente izraelite.
Gjithashtu uniformat blu kanë marrë në ruajtje edhe hotelin ku do të qëndrojë ekipi kombëtar izraelit, i cili pritet të mbërrijë në aeroportin “Nënë Tereza” të enjten pasdite. Shoqërimi dhe ruajtja e tyre u është ngarkuar forcave speciale RENEA, ndërsa në gatishmëri do të jenë edhe Forcat e Ndërhyrjes së Shpejtë.
Ndërkohë, ditën e ndeshjes, mësohet se policia do të ngrejë një perimetër sigurie rreth stadiumit ku do të ushtrohen disa kontrolle për të mos lejuar futjen e fishekzjarrëve, banderolave dhe sendeve të tjera të paligjshme.
Pallatet pranë stadiumit pritet të boshatisen gjatë zhvillimit të takimit, ndërsa të gjitha lokalet rreth tij do të mbyllen. Sipas burimeve nga policia, niveli i masave të sigurisë për këtë ndeshje i kalon edhe ato të marra për ndeshjen ndaj Serbisë.
Në planin e masave është përfshirë edhe Shërbimi Informativ Kombëtar, ku shumë agjentë civilë do të jenë në lëvizje para, gjatë dhe pas zhvillimit të takimit. /PanoramaSport/
