Sulmuesi i Partizanit, Theofilius Solomon, duket se do të jetë një ndër lojtarët që do të largohen në janar nga “demat”. Në konferencë për shtyp, trajneri Daja nuk e refuzoi largimin e Solomon apo ndonjë futbollisti tjetër, pasi bilanci i klubit duhet ruajtur dhe nuk duhet të ketë merkato vetëm në hyrje.
Pas Ja- sir Asanit, që pritet t’i japë Partizanit 20 mijë euro, është dhe Solomon që do të mbushë arkat e klubit. Ekipi që interesohet për shërbimet e sulmuesit të Partizanit, është Neftçi Baku. Skuadra e njohur Azere ka në gjirin e saj edhe Bruno Telushin, ish-futbollistin e Partizanit, i cili mund të ndikojë në zgjedhjen e Solomon.
Por sulmuesi nigerian është në kontratë me Partizanin dhe duhen bindur drejtuesit e klubit me një ofertë të kënaqshme që të heqin dorë nga numri 9 i ekipit. Vetë Solomon, në një intervistë, ka deklaruar se është gati të luajë për Neftçin në rast se arrihet një akord mes dy klubeve.
“Për momentin, nuk po bisedoj me asnjë klub. Jam në dijeni se ka pasur një kontakt të Neftçi Bekut me drejtuesit, por nuk mund të zbuloj më shumë. Sigurisht, nëse konkretizohet me sukses, do të isha më se i gatshëm të luaja për Neftçin”, u shpreh Solomon për “AzeriSport”. Solomon ka luajtur 11 ndeshje për Partizanin në Superiore, duke munguar vetëm në takimin ndaj Laçit, pasi pati plotësuar numrin e kartonëve të verdhë.
Nigeriani ka shënuar 2 gola në këto 11 takime, duke u aktivizuar jo në rolin e tij natyral, në krahun e majtë të sulmit. Gjatë ditëve të ardhshme, pritet dhe një ofertë konkrete nga ekipi i Neftçi Baku, që duket se ka interesim serioz për shërbimet e sulmuesit 23-vjeçar.
