Arjan Mezini, mjek pranë spitalit “Shefqet Ndroqi” u shpreh këtë të mërkurë gjatë një interviste televizive se situata në spitale e krijuar nga pandemia është më e lehtësuar dhe se pritet një rritje e rasteve në gjysmën e dytë të janarit, por jo në ato shifra sa në dy mujorin nëntor-dhjetor.
“Tek ne vihet re një qarkullim pak më i ulur, jo për të ulur vigjilencën. Besoj se do të ketë një shtim të numrit të rasteve por jo në ato shifra që pamë në nëntor apo fillim dhjetori. Ne vërejmë edhe nëpër spitale, unë do të nisesha nga indikacion indirekt, nuk po them nga indikacioni i testimit në terren, puna për spitale është ulur ndjeshëm, rastet që shtrohen, të paktën tek ne, nuk i kalojnë 5-7 maksimumi në ditë të caktuara 10 urgjenca kur para një muaji, ishin diku tek 31 deri 40. Kjo është një tregues sepse ai që është i sëmurë rëndë, që ka nevojë për kujdes spitalor, vështirë se e shmang. Domethënë, do të paraqitet në spital, në një formë apo në një formë tjetër. Kjo më bën të mendoj se edhe dy javëshi i fundit i janarit besoj do të ketë një rritje por jo në ato shifra siç ishin në nëntor”, u shpreh Mezini.
I pyetur mbi variantin e ri të COVID-19, mjeku u shpreh se nuk ka të dhëna që është më i rrezikshëm sesa aktuali, por vetëm fakti që është më ngjitës.
“Problemi me këtë virus nuk është se ka të dhëna që është më agresiv sesa varianti që ne njohim por përhapet shumë më shpejt, pra është më ngjitës. Kjo bën atë që ne e dimë tani, për t’u ruajtur sistemin shëndetësor nga kolapsi. Dhe ky është synimi i lockdown të tretë që po shohim në Britani, në Gjermani apo në Itali. Vaksina antiCovid do 3-4 javë që të japë efekt dhe kërkon kohën e vet”, përfundoi mjeku Mezini.
