Federata Shqiptare e Futbollit (FSHF) ka paralajmëruar klubet e Kategorisë Superiore dhe të Kategorisë së Parë në lidhje me fushën në stadiumet ku ato zhvillojnë ndeshjet.
Nisur nga problematika e shfaqur në disa fusha javën e fundit të kampionatit, ku terreni u shfaq në gjendje të rënduar, FSHF u ka kërkuar klubeve që të marrin masa për të ruajtur dhe mirëmbajtur fushat. Pas konstatimit në terren, situata në disa nga fushat e stadiumeve nuk garanton standardet për zhvillimin e ndeshjeve të kampionatit.
“Siç dihet, një nga elementët kyç në procesin e licencimit të FSHF për pjesëmarrjen në garat futbollistike është edhe kriteri i infrastrukturës. FSHF, përmes një qarkoreje, ka njoftuar të gjitha skuadrat që është e ndaluar të stërviten në fushën e stadiumit, ku edhe zhvillojnë ndeshjen, gjë që ka sjellë më pas rëndim të terrenit. Federata do të vijojë me inspektimet gjatë muajit janar 2021 dhe në rast se konstatohet ndonjë klub që shkel këtë rregull, do të ketë sanksione nga Komisioni i Disiplinës së FSHF, deri në pikën që skuadrat nuk do të lejohen të luajnë më në atë terren”, lexohet në njoftimin e FSHF-së.
