Në kuadër të votimeve të 25 prillit 2021, Komisioni Qendror i Zgjedhjeve i ka dërguar një kërkesë Drejtorisë së Përgjithshme të Gjendjes Civile, në lidhje me numrin e shtetasve që kanë rregjistruar adresën jashtë vendit.
“Në kuadër të projektit për mundësinë e votimit nga jashtë vendit për zgjedhjet për Kuvend të datës 25 prill 2021, po ju dërgoj për njohje kërkesën drejtuar Drejtorisë së Përgjithshme te Gjendjes Civile në lidhje me numrin e shtetasve që kanë rregjistruar adresën jashtë vendit”, thuhet në kërkesë.
Pak ditë më parë, gjatë një raportimi në Komisionet Parlamentare, ministri për Diasporën, Pandeli Majko, tha se shtetasit shqiptarë që jetojnë jashtë vendit do të votojnë edhe nvse nuk deklarojnë adresën e tyre të banimit. Sipas Majkos, ato duhet t´i drejtohen KQZ për t´u njohur me procedurat dhe do të pajisen me formularët. Madje Majko i cilësoi si të pavërteta pretendimet se ata që nuk deklarojnë adresën, pra nuk regjistrojnë një të tillë, nuk do të votojnë.
“Është krijuar një kakofoni. Duket sikur por të mos kesh deklaruar adresën, ti nuk merr të drejtë të votosh. Nuk është kështu. Në KQZ do regjistrohen drejtpërdrejt”, tha Majko.
Por duket se deklarimet e ministrit Majko bien ndesh informacionin që kërkohet zyrtarisht nga KQZ prej Gjendjes Civile.
