FIFA ndau sot çmimet për futbollistin dhe trajnerin më të mirë të vitit 2020.
Në një vit ku Topi i Artë nuk u dha për shkak të pandemisë, çmimi “The Best” ishte trofeu individual më i rëndësishëm i vitit dhe atë e fitoi Robert Lewandowski.
Polaku fitoi këtë vit 5 tituj me Bayern Munchen dhe u shpall golashënuesi më i mirë i Bundesligës dhe Champions League. Gjatë sezonit të kaluar, Lewandowski, shënoi 55 gola në 47 paraqitje duke qenë vendimtar në sukseset e skuadrës së tij.
Dy kandidatët e tjerë për këtë çmim ishin Cristiano Ronaldo dhe Leo Messi.
Portieri më i mirë i sezonit u shpall Manuel Neuer, i Bayern Munchen dhe kombëtares gjermane. Ai mposhti konkurrencën e Alisson Becker (Liverpool, Brazil) dhe Jan Oblak (Atletico Madrid, Slloveni). Një rikthim i fuqishëm i gardianit gjerman, që vitet e fundit ka qenë i kushtëzuar nga disa dëmtime.
Trajneri më i mirë i vitit u shpall Jurgen Klopp, i Liverpool. Kandidatët e tjerë ishin Marcelo Bielsa (Leeds) dhe Hansi Flick (Bayern Munchen).
FIFA publikoi edhe formacionin më të mirë të vitit: Alisson; Alexander-Arnold, Sergio Ramos, Van Dijk, Davies; De Bruyne, Alcantara, Kimmich; Messi, Lewandowski, Cristiano.
Son Heung-Min, koreano-veriori i Tottenham, fitoi çmimin “Puskas” për golin më të mirë të vitit.
Kishte edhe një çmim “Fair-Play”, të cilin e fitoi Mattia Agnese. Kur luante me Ospedaletti, adoleshenti shpëtoi jetën e një kundërshtari, që kishte humbur ndjenjat pas një përplasje me kokë, duke ndërhyrë me shpejtësi dhe i liruar rrugët e frymëmarrjes.
