Një grup studentësh, pjesë e lëvizjes “Për Universitetin” zhvilluan këtë të Mërkurë një protestë simbolike para Ministrisë së Arsimit. Nga protestuesit u kërkua dorëheqja e ministres së Arsimit Evis Kushi dhe u qëllua me vezë godina e ministrisë.
Një nga protestuesit deklaroi se ministrja, për ditë të tëra ka tentuar të njollosë protestën e drejtë të të rinjve.
“Të protestosh nuk është krim, por niveli më i lartë i vetëdijes qytetare. Krim dhe kriminale janë tentativat tuaja për të përndjekur të miturit në shkolla, a thua se nuk ka mjaftuar përzënia e mijëra të rinjve jashtë vendit dhe pamundësimi i arsimimit për shumë të tjerë. Të rinjtë e sotëm kanë nevojë për mundësi ekonomike dhe arsimim të denjë, dhe jo për psikologë të dërguar nga qeveria. Qeveria juaj ka dështuar në çdo fushë dhe ju, së bashku me paraardhëset tuaja, e keni fundosur përfundimisht sistemin arsimor në Shqipëri. Sot mundësi për t’u shkolluar siç duhet kanë vetëm të pasurit. Për fyerjen ndaj të rinjve dhe gjithçka që shkon mbrapsht në shkollat tona, ministria që ju përfaqësoni meriton të njolloset dhe ju vetë të dorëhiqeni! Sot, se nesër është vonë”, deklaroi ai.
