Mjeku shqiptar në Angli, Gazmir Balliu u shpreh se procesi i vaksinimit në Angli ka rritur optimizmin në popullësi.
Gjatë një lidhje direkte për një nga mediet e vendit, mjeku tha se aktualisht ky proces vaksinimi është në hapat e parë dhe fillimisht është kryer në rreth 50 spitale.
“Njerëzit janë shumë të interesuar që të paraqiten për të marrë vaksinën. Interesi ka qenë shumë i madh, na u desh që të ndryshojmë përgjigjet telefonike edhe tek qendra ime, t’u kërkojmë pacientëve që të mos telefonojnë për të marrë takime me vaksinë, por do të kontaktohen dhe do të paraqiten tek qendra e vaksinimit për të marrë vaksinën”, u shpreh ai.
Më tej, mjeku sqaroi se deri më tani vaksina ka rezultuar efektive dhe i vetmi problem është shfaqur vetëm tek dy pacientë të cilët kanë qenë alergjikë ndaj antibiotikut.
“Nuk ka pasur shqetësim, në ditën e parë ishin dy raste që ishin persona që kishin alergji nga vaksinat. Por, rastet e tjera, njerëzit nuk kanë pasur asnjë lloj problemi”, tha Balliu.
Mjeku foli edhe për mutacionin që ka pësuar koronavirusi.
“Ky mutacion i ri mendohet që mund të ketë qenë që nga pjesa e dytë e tetorit, kemi deri në 1000 raste të këtij virusi. Virusi gjithmonë ndryshon që të futet sa më mirë në qelizat e njeriut. Këto nuk sjellin asnjë avantazh tek virusi. Ka raste që këto ndryshime në virus e bëjnë që të jetë më infektues dhe ka raste që i sjell virusit në avantazh që mund të shmangë vaksinat ose mjekimet që po bëjmë. Në rastin që po flasim, nuk mendohet që ka një rritje te sëmundjes dhe vdekshmërisë nga ky virus, edhe nuk mendohet që do të ketë një mbrojtje kundër vaksinave që po përdoren ose që do të dalin në të ardhmen”, u shpreh mjeku.
