U luajtën katër ndeshje të javës së 7-të të Superiores. Vllaznia dhe Kukësi vijojnë me paraqitjet pozitive teksa kanë marrë fitoret e radhës.
Dy skuadrat arritën të bindin në transfertë teksa Vllaznia triumfoi në fushën e Kastriotit 0-3, me gola të shënuar të gjithë në pjesën e parë. Dunga, Dilaver dhe Imeri ishin ata që sollën suksesin e pestë në 7 ndeshje për shkodranët.
Më të njëjtin rezultat fitoi edhe Kukësi, duke dominuar totalisht takimin ndaj Bylisit në Ballsh. Friday dhe Ibraimi shënuan në pjesën e parë, ndërsa Limaj e vulosi rezultatin në 0-3 në minutën e 87.
Tirana kampione mori një fitore minimale në një fushë tejet të vështirë si ajo e Laçit. Batha ishte autori i golit të vetëm në këtë sfidë. Kjo ishte fitorja e parë e bardhebluve pas plot 5 ndeshjeve në kampionat si dhe triumfi i parë i Dedes në rikthimin e tij si trajner i Tiranës.
Ndërkohë, Apolonia mori fitoren e parë në këtë kampionat, duke triumfuar me një gol ndaj Skënderbeut.
