Gruaja shqiptare, e cila vrau një vajzë 7-vjeçare duke i prerë fytin me thikë në një park të Bostonit (Angli), në mars të këtij viti, është dënuar me burgim të përjetshëm.
30-vjeçarja Eltiona Skana ka shumë mundësi që të mos dalë më kurrë nga burgu, pavarësisht se psikiatri ka thënë se shqiptarja vuan nga skizofrenia, gjë që e ka çuar në aktin makabër.
Gjithsesi, Gjykata e Mançesterit dha një vendim hibrid, që do të thotë se Skana do të futet në burg vetëm nëse ia lejon trajtimi i saj dhe, nëse nuk do të jetë e mundur të futet në burg, do të qëndrojë në spital për një kohë të pacaktuar.
Gjatë 7 ditëve të fundit, dëshmitarët kanë treguar se Skana e vrau 7-vjeçaren Emily Jones, ndërkohë që fëmija po lëvizte me “scooter” në park. 30-vjeçarja u ngrit me vrull nga stoli ku po qëndronte, e kapi fëmijën dhe i preu fytin me një thikë që e kishte blerë mëngjesin e asaj dite.
Sipas mediave britanike, Skana hyri në Mbretërinë e Bashkuar ilegalisht në vitin 2014 dhe aplikoi për azil, duke pretenduar se ishte viktimë trafikimi. Fillimisht, azili iu refuzua, por, pas apelit, iu lejua që të qëndronte në Britani deri në dhjetor 2024.
Policia e Mançesterit publikoi dje edhe pamjet e arrestimit të shqiptares, pak momente pas vrasjes së Emily Jones.
