Klodian Rasha u qëllua për vdekje në orët e para të mëngjesit të sotëm nga një punonjës i Policisë së Shtetit, ndërsa ngjarja e rëndë vijon të mbetet mister. SHÇBA në reagimin zyrtar shprehet se vrasje është kryer në kapërcim të kufijve të mbrojtjes së nevojshme. Gjithashtu SHÇBA shprehet se polici e ka qëlluar sepse nuk arriti ta prangoste.
Reagimi i SHÇBA erdhi pasi më parë u njoftuan disa versione lidhur me ngjarjen e rëndë, për të cilën Policia e Shtetit ende nuk ka reaguar me një deklaratë, përveç, një njoftimi të orëve të para që shtonte edhe më shumë dyshimet mbi mënyrën e ekzekutimit të të riut.
Por ajo që tërheq vëmndjen nga shumë prej lajmeve të emetuara është versioni për të marrë në mbrojtje policinë, madje duke shkuar drejt skenarëve që as vetë SHÇBA pas disa orë hetimesh, nuk arriti që ti provonte.
Gazeta e drejtuar nga Carlo Bolino shkruante se viktima i kishte drejtuar armën punonjësit të policisë, i cili në kushte të tilla kishte qëlluar.
Vetë SHÇBA njoftonte se në rrugicat ku ka kaluar 25-vjeçari u gjet një armë, e cila sërisht nuk thuhet nëse i përket ose jo viktimës. Pra në momentin kur polici është përballur me 25-vjeçarin ai nuk ka pasur armë, pasi edhe po të ketë posejduar një të tillë, mund ta ketë flakur.
Versionin që jep media nuk pati guxim as policia t’a pohojë në atë njoftimin paraprak për ngjarjen, pra që t’i vendosë viktimës një armë në duar, sikundër raportohet nga gazeta e Bolinos.
Atëherë pyetja që lind është: ku e pa media e Carlo Bolinos armën që iu drejtua punonjësit të policisë, i cili më pas qëlloi dy herë mbi 25 vjeçarin?
Këtë version media e Bolinos e mbajti për orë të tëra deri në reagimin zyrtar të SHÇBA-së.
Mediat mund të raportojnë nxitimthi versione të ngjarjeve, por në rastin konkret u raportua një version që as policia, as prokuroria, as SHÇBA, madje ndoshta as vetë efektivi që qëlloi nuk e ka pohuar.
