Mario Baloteli ishte në kërkim të një skuadre për t’u aktivizuar këtë sezon duke parë që sfida e fundit ku sulmuesi ka luajtur datonte më 9 mars, me fanellën e Breshias.
Pas vizitave mjekësore dhe kontratës që pritet të lidhë me skuadrën e Monzas deri më 30 qershor të 2021, Administratori i Deleguar i klubit nga Brianca, Adriano Galiani ka bërë çmos që “SuperMario” të mos jetojë larg nga qendra stërvitore duke e përfshirë edhe në klauzolë në kontratën e tij dhe për këtë gjë, ish-drejtuesi i Milanit ka mundësuar që Baloteli të jetojë tek shtëpia e Kevin-Princ Boateng i cili e kërkoi me ngulm.
Të dy e njohin mirë njëri-tjetrin pasi kanë qenë pjesë e Milanit përpara disa sezonesh. Vullneti i vetë Galianit ishte monitorimi nga afër i yllit të tyre të ri dhe për t’u rikthyer përsëri në atë “SuperMario” të shfaqur vite më parë.
