Për shkak të merkatos të bllokuar nga UEFA, trajneri Daja u detyrua të bëjë me skuadrën që kishte në dispozicion.
Të kuqtë janë konsoliduar dhe duket se ruajtja e grupit të vjetshëm i ka bërë mirë dhe renditen të dytët pas gjashtë javësh kampionat. Një nga më të rëndësishmit e këtij grupi është Jurgen Bardhi.
Pikërisht 23-vjeçari ishte një ndër të ftuarit e gazetarit Alban Xhihani në “Zona Gol”, teksa në lidhje të drejtpërdrejtë dha opinionin e tij edhe për ndeshjen derbi të së premtes, por dhe për vështirësitë që ka hasur me trajnerët e kaluar të Partizanit.
“Kisha kohë pa luajtur, por Daja më dha një dorë dhe po bëjmë mirë. Unë kam 6 vite këtu dhe për të ardhmen ia kam lënë në dorë drejtorit dhe presidencës. Kështu është futbolli, dalin lojtarë të mirë por edhe jo të mirë.”
23-vjeçari nga Fushë Kruja deklaroi se ndryshimet e shumta në skuadër, afrimi i lojtarëve vit pas vit e kanë penalizuar sa i përket vazhdimësisë
“Pavarësisht se mund të kem bërë mirë, përsëri kur vinin lojtarë të rinj luanin ata, duke thënë se Bardhi është i ri. Me Gegën luajta pykë, nuk ishte roli im, por nga halli. Te Partizani ka pasur presion, Bardhi e ndjente atë. Unë erdha nga Fushë-Kruja dhe nuk kisha forcën të çaja. Vinin trajnerë të rinj dhe unë përfundoja jashtë. Aktivizohesha në krahë, aty ku nuk ishte roli im, nuk jepja maksimumin dhe më pas ndeshjen tjetër nuk aktivizohesha.”
