Juventusi fitoi mbrëmjen e djeshme ndaj Dynamo Kiev duke hedhur një tjetër hap për të kryesuar grupin dhe të pasur një short më të lehtë për fazën e 1/16-ave.
Por që të arrihet vendi i parë duhet të mundet Barcelona me 3 gola e lart diferencë në ndeshjen e fundit.
Mbrojtësi Leonardo Bonucci e di mirë vështirësinë, por nuk dorëzohet.
“Nuk do të jetë e lehtë të shënojmë tre gola Barcelonës për të zënë vendin e parë, por ne do të përpiqemi më të mirën tonë.
E dimë se ka një proces dhe një rrugë nga e cila duhet të kalojmë. Synimi ishte të kualifikoheshim në fazën tjetër dhe të ishim në garë me Barcelonën për vendin e parë deri në fund, kështu që ne e kemi arritur synimin. Tani do të përpiqemi të përfundojmë punën.
Mendoj se jemi në rrugën e duhur duke marrë parasysh që nuk kemi pasur ndonjë pushim të vërtetë ose stërvitjen e zakonshme parasezonale që na nevojitet kur ka ndryshime si në stol dhe skuadër.
Shoh te të gjithë dëshirën për tu përmirësuar dhe rritur. Nëse shikojmë të gjitha klubet e mëdha përreth Evropës tani, ata të gjithë po vuajnë në një farë mënyre.
Ndihem sikur çdo ndeshje është një festë e një rekordi të Ronaldos. Është kënaqësi të jem i pranishëm në këto momente të karrierës së jashtëzakonshme të tij”, u shpreh Bonucci.
