Një vit më parë u zbuluan simptomat e Covid-19 në Wuhan të Kinës. Sot, në qytetin prej 11 milionë banorësh, izolimet apo masat e ashpra kanë mbetur pas, duke ia lënë vendin rihapjes së ekonomisë. Pekini ka deklaruar fitoren ndaj virusit, ndërsa po përpiqet të adresojë origjinën e tij drejt vendeve të tjera, si SHBA, Itali apo Indi.
“Megjithëse Kina ishte e para që raportoi rastet,” tha zëdhënësi i Ministrisë së Jashtme Zhao Lijian, “kjo nuk do të thotë domosdoshmërisht se virusi e ka origjinën në Kinë.”
Nga disa besohet se Instituti i Virologjisë Wuhan është origjina e COVID-19. Ndonëse gazetarë të shumtë janë përpjekur të depërtojnë në brendësi të situatës dhe sistemit shëndetësor, mjekët kanë refuzuar të flasin pasi e kanë të ndaluar.
Të kuptuarit e origjinës së Covid-19 është jetike për përpjekjet për të parandaluar pandeminë e ardhshme. Fatkeqësisht, tani për tani Pekini duket më shumë i përqendruar në pyetjen se kush duhet të mbajë fajin për sëmundjen, sesa në të kuptuarit se nga ka ardhur.
Një vit më vonë, ka ende shumë pyetje pa përgjigje. Tre janë boshllëqet më të mëdha mes njohurive tona: cila është origjina e Covid-19, përse disa njerëz vuajnë më gjatë nga ky infeksion dhe përsa kohë antitrupat mund t’i mbrojnë individët nga riinfektimi. Përsa kohë të mos ketë një përgjigje precize, akti më i duhur do të ishte zbatimi i distancimit social dhe mbajtjes së maskave./ CBS
