Ndihmës-Sekretari amerikan i Shtetit për Çështje Evropiane dhe të Euro-Azisë, Philip Reeker, i ka dërguar një letër kryeministrit maqedonas Zoran Zaev, ku thekson zhgënjimin për shkak të dështimit në arritjen e marrëveshjes nga vendet anëtare të BE-së për kornizën negociuese me Maqedoninë e Veriut.
“Integrimi në Bashkimin Evropian mbetet interesi ynë i përbashkët dhe ne do të vazhdojmë ta çojmë përpara atë me partnerët tanë evropianë në mbështetje të organizimit të konferencës ndër-qeveritare me Maqedoninë e Veriut gjatë presidencës gjermane”, thekson zyrtari i DASH.
Ndër të tjera në letrën e tij Reeker thekson mbështetjen e Shteteve të Bashkuara për synimet dhe përpjekjet e Shkupit drejt përparimit dhe integrimin evropian.
Ndërkohë, Bullgaria fqinje ka bllokuar procesin e integrimit të Maqedonisë së Veriut për shkak të mosmarrëveshjeve lidhur me historinë dhe gjuhën e popullit maqedonas.
Reeker inkurajon Maqedoninë e Veriut dhe vendet e BE-së që të kërkojnë zgjidhje për çështjet dypalëshe jashtë integrimit të Maqedonisë së Veriut në Bashkimin Evropian.
