Sot Shqipëria regjistroi një shifër rekord viktimash nga koronavirusi, ndërsa 18 qytetarë humbën jetën në spitalet Covid, sipas deklarimeve zyrtare.
Por sërisht deklarata e Ministrisë së Shëndetësisë vijon me refrenin, i cili gjendet në çdo deklaratë ditore për të mbajtur maskën, ruajtur distancën dhe mbajtur higjenën personale.
Prej disa ditësh Ministria nuk jep më as moshën e personave që humbasin jetën, duke dhënë thjesht si informacion që variojnë nga kjo deri në këtë moshë.
Dhe fjalia që nuk ndryshon është ajo që “Ministria i shpreh ngushëllime familjarëve për humbjen e të afërmve”.
Një deklaratë standarde, njëlloj sikur deklaroheshin 5 apo 10 raste të reja, dhe sot që numërohen plot 18 viktima.
Në kushte të tilla, minimalisht Ministria e Shëndetësisë si institucioni qendror që menaxhon situatën e pandemisë, bashkë me Komitetin Teknik të Ekspertëve, duhet të sqarojnë se çfarë ndodh me pacientët, pse ato transportohen në gjendje kritike në spitalet Covid, çfarë protokolli mjekimi ndiqet dhe si shpjegohet që personat që hyjnë në intubim në këto spitale, nuk mbijetojnë.
Prej ditësh po raportohet një shifër e lartë humbjesh njerëzore si pasojë e koronavirusit, ndërsa duket se informacionet zyrtare janë kthyer në një rutinë, ku në orët e pasdites, përmes një deklarate bëhet e ditur gjendja mbi pandeminë në vend.
Dje nga salla e Parlamentit, ministrja e Shëndetësisë, i drejtoi një thirrje qytetarëve që t’i drejtohen spitaleve Covid-19 më shpejt, ndërkohë që nga denoncimet e shumta në publik, qytetarët janë të detyruar të presin disa ditë sa Urgjenca Kombëtare apo epidemiologët e terrenit, t’u marrin tamponët. E nëse nuk diagnostikohesh, nuk mund të mjekohesh, edhe sikur të qëndrosh në banesë, me teorinë se duhet të sillet si i infektuar.
Pra vonesat nuk kanë të bëjnë me qytetarin, i cili ka në dispozion një numër, 127, dhe një tjetër të mjekut të familjes, i cili duhet të ndjekë pacientët përmes telefonit.
Vonesa që krijohet ka të bëjë pikërisht me mosfunksionimin e zinxhirit shëndetësor për të vlerësuar në kohë gjendjen e pacientit.
Ky është një apel që kanë javë që e japin mjekët, ata që përditë përballen në dyert e spitaleve me të prekurit nga koronavirusi.
Një mesazh që fatkeqësisht nuk dëgjohet, ndërsa viktimat shtohen dhe përgjegjësia sërisht u hidhet qytetarëve. /BN/
