Dashamir Shehi në Open kundërshtoi mjekun Gjergj Koja i cili tha se diskutimi për të kthyer mësimin me alternim erdhi si pasojë e incidencave të virozave stinore. Sipas Shehit, deklarata e mjekut është absurd sepse nëse do të ishte kështu edhe vitin e kaluar duhej të ishin mbyllur shkollat.
“ Unë nuk jam dakord të mbyllen shkollat të paktën ato deri në klasën e tetë ose të nëntë. Unë them ta segmentojmë. Këtu ka paqartësi. Unë kam një ide timen. Kam sugjeruar qeverisë dhe kolegëve të opozitës: Këtu pranë kemi Italinë, marrim protokollet e tyre, mos bëjmë shpikje natë për natë.
Të marrim protokollet e një shteti më të zhvilluar dhe kjo për hirë të eksperiencës sonë të vogël. Mos të merremi shumë me deklarata që ndryshojnë çdo ditë. Ne nuk kemi autonomi të institucioneve të ekspertizës. Tek ne çdo gjë e vendos politika. Duhen mbajtur hapur dy zinxhirët , ai i punës dhe shkollat fillore. Do e bëjmë me sforco duke mbyllur kategorinë e të rriturve.”
