Ministrja e Bujqësisë së Holandës, Carola Schouten, deklaroi ditën e diel se janë vrarë 190,000 pula, pas shfaqjes së gripit të shpendëve, të variantit H5, në të paktën dy ferma.
Gripi i shpendëve, i cili përhapet kryesisht përmes zogjve migrues, është zbuluar në disa ferma holandeze që nga tetori dhe tashmë janë ndërmarrë masa për të parandaluar përhapjen e sëmundjes, shkruan TheIndependent.
Në Francë, një rast i ri i gripit të shpendëve u zbulua të enjten në një dyqan kafshësh afër Parisit, tre ditë pas njoftimit të shpërthimit të parë në departamentin e Haute-Corse.
Suedia, Irlanda dhe Mbretëria e Bashkuar gjithashtu janë prekur.
Sëmundja, në raste të rralla, shkakton te njerëzit simptoma të tilla, si temperatura e lartë, dhimbje muskujsh, dhimbja koke dhe kollë. Virusi mund të merret edhe përmes kontaktit me zogj të infektuar ose përmes ngrënies së shpendëve të pagatuar mirë.
