Në momentin që kombëtarja shqiptare u njoh me shortin e Grupit 4 të Ligës C në Nation League, objektivi padyshim ishte vendi i parë në grup.
Tashmë mund të themi se objektivi u arrit me sukses, por rrugëtimi i Shqipërisë ishte më i vështirë seç u parashikua. Gjithsesi me fitoren 3-2 ndaj Bjellorusisë, kombëtarja siguroi ngjitjen në Ligën B.
Për këtë sukses, ka reaguar sigurisht edhe presidenti i FSHF-së, Armand Duka. Me anë të një postimi në Facebook, ai thekson se ndihet krenar për këtë skuadër.
“Fitore e madhe, që erdhi në çastin e duhur. Sot djemtë kuqezinj na dhuruan emocione, sakrifice, kualitet, gola dhe mbi të gjitha për ngjitjen një grup më lart në UEFA Nations League. Një objektiv i realizuar. Ndjehem krenar për kombëtaren dhe stafin e saj. Krenar për arritjet e futbollit shqiptar. Historia vazhdon“, shkruan Duka.
