Prokuroria e Tiranës ka nisur hetimet për shitjet online të bombolave të oksigjenit. Dyshimet e akuzës janë se pjesa më e madha e tyre dyshohet se i kryejnë shitjet në mënyrë të jashtëligjshme dhe se bombolat e oksigjenit janë jashtë standardeve për kurimin e të sëmurëve.
Çmimi i një aparati oksigjeni në faqe të ndryshme online varion nga 500 në 800 euro. Por, ato jepen edhe me qira ditore, vlera e të cilëve shkon 100-120 euro.
Indicien e parë për nisjen e hetimeve të aparaturave të oksigjenit që shiten online, institucioni i akuzës e mori tri javë më parë, pas kallëzimit të dy vëllezërve, të cilët rrëfyen se për bananë e tyre të infektuar me koronavirus fillimisht përdorën aparatura oksigjeni që kishin blerë në FB.
Në kallëzimin e tyre, ata u shprehën se se babanë e çuan në spital, 4 ditë para se ai të ndërronte jetë. Gjithashtu, prokuroria është duke hetuar edhe rastin e së dielës, ku një të moshuari i shpërtheu bombola e oksigjenit, duke i shkaktuar dëmtime të rënda. Në këtë banesë u gjetën edhe dy bombola të tjera oksigjeni, të cilat dyshohet se janë blerë nga familjarët e tij në mënyrë private.
Disa ditë më parë, Ministrja e Shëndetësisë Ogerta Manastirliu, në një deklaratë për mediat , u bëri apel qytetarëve që mos të bien pre e abuzimeve përsa i përket marrjes së trajtimit ambulator në shtëpi, pasi sipas saj, oksigjeni nuk mund të përdoret në kushte shtëpie pa asistencën e nevojshme mjekësore.
