Partizani duket se ka ndryshuar “fytyrë” nën drejtimin e Ilir Dajës. Tri fitore në katër sfidat e para në krye të “demave të kuq” për trajnerin 54- vjeçar, i cili vazhdon të tregojë se është një ndër trajnerët më të mirë në futbollin shqiptar.
Edhe pse me merkato të bllokuar, kryeqytetasi ka arritur të ndërtojë një skuadër funksionale, duke “ringjallur” disa futbollistë dhe duke ulur me këmbë në tokë disa të tjerë.
Dy sulmuesit Brown dhe Solomon duken shumë më të uritur dhe shumë më të motivuar për të bërë mirë me fanellën e Partizanit dhe të dy kanë pranuar se nën urdhrat e Dajës, ndihen më komodë. Gjithashtu, edhe mesfushori Hyseni po merr rolin e protagonistit, pas disa aventurave si i huazuar. Te Partizani, nuk ka as të paprekshëm, gjë që mund të cilësohet edhe si sekreti i këtij starti pozitiv të sezonit.
Këtë gjë, Daja po e tregon me mesfushorin brazilian, Kordeiro Melo. 27-vjeçari pritej të ishte protagonist absolut për “demat” këtë sezon, por për sa kohë nuk është në 100% të formës fizike dhe i fokusuar të luftojë për skuadrën, Daja i ka treguar stolin, madje edhe tribunën. Partizani ka në krye të stolit një trajner me ide të qarta.
