Nga Boldnews.al
Për fatin e keq të qytetarëve, po realizohet “profecia” e Edi Ramës, kur fliste për spitale të tejmbushura, për ambulanca që niseshin në kortezhe të gjata me të sëmurë me koronavirus dhe spitale që nuk përballojnë më të shtruarit. Më pas arkivolë të rreshtuara, varreza të shtuara dhe familje të humbura. I gjithë ky skenar ogurzi, jepej çdo ditë nga kryeministri Edi Rama në muajin mars, kur i gjithë vendi u fut në karantinë.
Sot kjo po ndodh. Dy spitalet covid 1 dhe 2 janë tejmbushur, ndërsa ambulancat me të sëmurë qëndrojnë në oborret e spitaleve me shpresën se ndonjë pacient do të dalë i shëruar dhe vendin e tij ta zërë dikush tjetër që ka nevojë të menjëhershme. Prej pesë ditësh numri i të prekurve shkon në shifrat 450-500, një shifër mjaft e lartë për një popullsi të vogël si Shqipëria.
Sikur të mos mjaftojë kjo, tamponët për të zbuluar nëse je ose jo i infektuar janë ende me pikatore nga një politikë abusurde, ku qeveria fshihet pas “Komitetit të Ekspertëve”. Në fakt, këta të fundit kanë treguar se janë ekspertë në letra të fushave të ndryshme, por më shumë dinë të bëjnë punën e “ekspertëve të partisë”, për të mbuluar skandalet dhe propaganduar suksese imagjinare.
Sot duhet thënë e vërteta që vendi është në prag kolapsi nga numri i lartë i të prekurve, por mbi të gjitha i pamundësisë për t’i kuruar në kohë në spitale. Gjithashtu edhe daljet me haluçinacionet “3D” të Ramës dhe shpurës së tij në qeveri se ishte bërë gati spitali covid 3, u vërtetua se ishte një mashtrim i madh.
Spitali covid 3 i vendosur në ish-krurgjinë e QSUT-së nuk është gati dhe pritet të jetë si ngrehinë edhe për disa kohë. Sipas burimeve nga Boldneës.al, së pari mungojnë aparaturat në këtë pavion që u trumbetua se ishte gati për të pritur pacientët me covid dhe e dyta që është më e rëndësishme nuk ka mjekë specialist të fushës.
Nëvojiten që mjekët të jenë infeksionistë dhe epidemiologë, si më të trajnuarit për të kuruar të sëmurët me covid, të cilët mungojnë. Fakulteti i mjekësisë ka nxjerrë vetëm vitet e fundit me qindra mjekë të këtyre specialiteteve, por shumica e tyre janë larguar drejt Gjermanisë.
Talljet e kryeministrit se ikjet e mjekëve dhe infermierëve nuk janë problem, madje sipas tij ishin mëse normale, sot po kthehet në boomerang, sepse covid, përveç basës materiale mbi të gjitha ka nevojë për mjekës specialist dhe të përgjeshëm, të cilët nuk duhet të ngatërrojnë bluzën e bardhë me “uniformën e Rilindjes”.
Tashmë po mohohet nga qeveria edhe pjesa e dukshme. Autoambulancat janë kthyer për disa orë si “shtretër spitali”, ndërsa familjarët e të sëmurëve mes ankthit shohin nëse i afërmi i tyre ka “fatin” të shtrohet në spital, apo do të qëndrojë me rrezikun se nga çasti në çast mund të japë frymën në një autoambulancë sepse nuk ka më vende të lira.
Gjendja është dramatike dhe sot askush në Ministrinë e Shëndetësisë, apo vetë kryeministri, nuk e zë më me gojë situatën me pandeminë. Për të është e rëndësishme fushata elektorale, duke kërkuar edhe një mandat të tretë dhe zaptuar në çdo kohë mediat me propagandën e ditës, me lajthitjet të qëllimshme në reagimet e rrjeteve sociale, ku synimi i vetëm mbetet: shpërndarja e sa më shumë mjergulle për të shmangur problemin covid. Koronavirusi tashmë po na merr jetë dhe mbi të gjitha ka futur shoqërinë në ankth masiv, pasi infrastruktura shëndetësore është edhe më “rëndë” se vetë sëmundja.
