Në Greqi pritet të mbyllen edhe shkollat fillore. Vendimi, sipas mediave Helene, pritet të bëhet i ditur gjatë ditës sot.
Më herët, zëdhënësi i qeverisë Stelios Petsas kishte paralajmëruar vendimin, i cili pritet të shpallet pasdite nga Ministri i Arsimit Niki Kerameos.
Vendimi për mbylljen e shkollave fillore nuk merret sepse shkollat janë një vatër transmetimi, por sepse nga njëra anë lëvizja do të jetë e kufizuar, nga ana tjetër do të dërgohet mesazhi se gjërat janë shumë serioze, raportojnë mediat greke.
Sugjerimi i specialistëve të sëmundjeve infektive për mbylljen e shkollave fillore ishte bërë në fillim të kësaj jave dhe kishte të bënte me Selanikun.
Sidoqoftë, përhapja e pandemisë po ndryshon të dhënat, pasi gjithnjë e më shumë zona po hyjnë në “zonën e kuqe”.
