Bosi i Tesla-s, Elon Musk përmes një postimi në Twitter, ka zbuluar se ka kryer katër teste për Covid 19 brenda ditës, nga të cilat ka marrë rezultate të ndryshme.
Sipas Musk, nga katër testet që ka kryer, 2 i kanë dalë pozitive dhe 2 të tjerë negativë, ndërkohë që i janë kryer nga e njëjta infermiere dhe nga e njëjta kompani. Ai tregon se ka pasur një ftohje të lehtë, dhe kjo e ka shtyrë që të vendosë të testohet për Covid.
“Diçka jashtëzakonisht e rreme po ndodh. Sot u testova për kovid katër herë. Dy përgjigje më rezultuan negative dhe dy të tjera pozitive. E njëjta makinë, i njëjti test, e njëjta infermiere. Test i shpejtë i antigjenit nga BD”, shkruan Musk në postimin e tij në Twitter, që ka ndarë në mes dhe ndjekësit e tij, një pjesë e të cilëve e konsiderojnë një reagim të pavend, i cili mund të nxisë pasiguri.
Musk, prej kohësh është treguar skeptik ndaj COVID, dhe sipas disa prej ndjekësve, kjo që thotë se i ka ndodhur me testet mund të jetë thjesht një aludim.
Ndërkohë, që në vijim, Musk është shprehur se ndërsa përgjigjet e testeve mund të jenë false, paratë që këto kompani marrin nuk janë aspak të tilla. Musk ka akuzuar mjekët për fryrjen e numrave të personave të prekur me Covid, ndërkohë që vazhdimisht ka bërë parashikime për uljen e rasteve të të prekurve, të cilat duhet thënë se deri më tani nuk i kanë dalë.
