Kryeministri Edi Rama, u është përgjigjur kritikave lidhur me koronavirusin se ka dalë jashtë kontrollit.
Sipas Ramës, në spitalet Covid shërbimi është si në spitalet e Europës. “Pa asgjë mangut krahasuar me kushtet spitalore, kurat farmaceutike, shërbimin mjekësor në spitalet Covid të Europës!”, – shkruan Rama.
Ndërkohë, siç raportohet situata në spitalet tona ka dalë jashtë kontrollit, por kryeministri e mohon këtë gjë.
Pacientetë trajtohen në ambulanca, ndërsa në spitale lihen në korridore, por kryeministri sërish e mohon.
Postimi i Ramës:
Ne do ta bëjmë me të gjitha forcat luftën me Armikun e Padukshëm dhe fronti ynë i mbrojtjes në spitalet Covid do të jetë deri në fund, një shembëlltyrë e vendosmërisë, kurajos, profesionalizmit, pa asgjë mangut krahasuar me kushtet spitalore, kurat farmaceutike, shërbimin mjekësor në spitalet Covid të Europës!
Ne do t’i rindërtojmë një për një shtëpitë, apartamentet, shkollat, kopshtet, spitalet e qendrat shëndetësore të shembura nga tërmeti, në kohë rekord krahasuar me ecurinë e një procesi të tillë në vendet që janë përballur me këtë sfidë!
Dhe Shqipëria do të dalë më e fortë nga këto dy sfida të rënda, të cilat mund t’i përballojë e t’i fitojë vetëm kjo shumicë qeverisëse, sepse ne nuk jemi më të mirët dhe kemi patjetër të metat, gabimet, boshllëqet tona, po më të mirë se ne për Shqipërinë nuk ka!
