Mjekëte njohur Arjan Mezini, pneumolog, dhe profesori i imunologjisë, Genc Sulcebe, janë shprehur kritikë ndaj protokolleve mjekësore që po përdoren nv pacientët me Covid-19.
Gjatë debatit në Open, Mezini dhe Sulcebe, i konsideruan të gabuara recetat që lëshohen nga mjekët, që bombardojnë me antibiotikë dhe kortizonikë pacientët sapo ata evidentohen si të prekur nga Sars-Cov2.
“Janë plotësisht të gabuara antibiotikët që jepen me shumicë. Unë e kam kaluar vetë Covid-19 dhe trupi ka forcat imune për të luftuar virusin. Është e pakuptimtë përdorimi i antibiotikëve që në ditët e para, pasi kjo ul imunitetin dhe zhbën rolin e antibiotikëve dhe kortizonikëve”, tha Sulcebe.
I të njëjtit mendim ishte edhe pneumologu Mezini, sipas të cilit nuk mund të ketë të njëjtat protokolle mjekimi për pacientë të ndryshëm.
“Ka pacientë që s´kanë nevojë fare për antibiotikë apo kortizonikë, të cilët fillojnë pas ditës së 8, nëse ka një përkeqësim të gjendjes. Antibiotiku dhe kortizoniku fillojnë vetëm kur te pacienti, Covid-19 shkakton pneumoni. Çfarë po shikojmë sot ne? Nga dita e parë që një pacient evidentohet me Covid, i jepet një recetë me 1 apo 2 antibiotikë, kortizonikë që në vend që t´a ndihmojnë i përkeqësojnë gjendjen”, tha Mezini.
