Autoritetet shëndetësore në Kosovë raportuan këtë të mërkurë 773 raste të reja me koronavirus në 24 orët e fundit, nga 1 519 testime.
Instituti Kombëtar i Shëndetit Publik (IKSHPK) njoftoi po ashtu se janë regjistruar katër viktima.
Sipas të dhënave të këtij Instituti, të mërkurën janë regjistruar edhe 137 të shëruar, ndërsa raste aktive aktualisht janë 8 845.
Prej 13 marsit, kur janë regjistruar rastet e para me koronavirus në Kosovë, autoritetet shëndetësore kanë raportuar për 26 121 të prekur nga Covid-19.
Prej tyre, 777 pacientë kanë vdekur.
Kryeministri i Kosovës, Avdullah Hoti, prezantoi më herët gjatë ditës së sotme masat e reja për parandalimin e përhapjes së COVID-19, që do të hyjnë në fuqi të premten.
