Vitet janë thjesht numra për një si Zlatan Ibrahimoviç, që ndonëse me 39 të tillë mbi supe, po kalon një rini të dytë me fanellën e Milanit, pasi ka shënuar 7 gola në 4 ndeshje në kampionat dhe po udhëheq kuqezinjtë në kreun e renditjes së Serisë A.
Sulmuesi suedez u rikthye në Milano dhjetorin e kaluar dhe gjatë kësaj vere rinovoi kontratën deri në qershor të 2021-shit me kuqezinjtë, por tani Maldini e Gazidis po mendojnë t’ia zgjasin edhe më tej bashkëpunimin.
Forma mjaft e mirë e Ibrës, por edhe roli i tij prej lideri në një organikë të mbushur me futbollistë të rinj të talentuar, po josh drejtuesit kuqezinj që ta mbajnë suedezin edhe një sezon tjetër në skuadër.
Kështu krahas emrave si Donnarumma, Calhanoglu dhe Franck Kessie, tani Maldini ka vënë në agjendë edhe rinovimin me Ibrën, prania e të cilit ka qenë frymëzuese edhe për lojtarët e tjerë.
