Champions League ka dhuruar një tjetër mbrëmje emocionuese, teksa sonte u luajtën takimet e para të raundit të tretë të fazës së grupeve.
Në sfidën kryesore dhe më të ndjekur, Real Madrid ka mposhtur Interin. Madrilenët e Zidane kanë marrë fitoren e parë për këtë sezon në Champions League edhe pse rrezikuan shumë ndaj zikaltërve. Fillimisht në pjesën e parë Benzema përfitoi nga një gabim dhe me portën e boshatisur kaloi të tijët në avantazh. Më pas ishte Ramos që dyfishoi por Inter reagoi shpejt me Lautaron.
Në pjesën e dytë Perisiç barazoi duke shokuar vendasit, por qetësia zgjati vetëm 12 minuta pasi Rodrygo i dha fitoren. Me këtë fitore Real Madrid shkon në kuotën e 4 pikëve kurse Inter mbetet në vendin e fundit, pa asnjë fitore në grup. Në ndeshjen tjetër Borussia Mönchengladbach ka surprizuar në Ukrainë duke shpartalluar 0-6 Shakhtar Donetsk.
Fitore të thella kanë marrë edhe Liverpool 0-6 në Atalanta si dhe Bayern 2-6 në Austri. Manchester City dhe Porto kanë marrë fitore të lehta nga 3-0 ndaj rivalëve të Olympiacos dhe Marseille kurse Ajax po ashtu mori 3 pikë ndaj Midtjylland me një fitore të ngushtë 1-2.
E vetmja që shpërdoroi në këtë mbrëmje nga favoritet ishte Atletico Madrid që në acarin rus u ndal nga Lokomotiva e Moskës 1-1.
