Një ditë pas ndeshjeve të Kupës së Shqipërisë, Komisioni i Disiplinës pranë FSHF-së ka zyrtarizuar edhe dënimet e para për këtë sezon futbollistik.
Bie në sy dënimi ndaj Luftëtarit të Gjirokastrës, ekip i cili nuk u paraqit në ndeshje ndaj Elbasanit.
Ekipi jugor humbet ndeshjen 3-0 në tavolinë dhe nuk ka të drejtë të marrë pjesë as në sezonin e ardhshëm të Kupës së Shqipërisë.
Siç raportuam edhe një ditë më parë, Luftëtari me shumë gjasa do të riniset vitin e ardhshëm nga Kategoria e Dytë pasi as në këtë sezon të Kategorisë së Parë nuk do të marrë pjesë.
Dënimit nuk i ka shpëtuar as lojtari i Skënderbeut, Shqiprim Taipi, i cili është dënuar me 1 ndeshje pezullim, përsëri për sjellje josportive ndaj kundërshtarit.
VENDIMET:
- Lojtari i FK Dinamo, Plarent Fejzaj, për sjellje josportive ndaj kundërshtarëve, në bazë të Nenit 47/1/d të KDS dënohet me 4 (katër) ndeshje pezullim nga aktiviteti futbollistik.
- Zyrtari i KF Egnatia, Klaudian Dervishi, për protestë ndaj vendimeve të zyrtarit të ndeshjes, në bazë të Nenit 55/2 të KDS dënohet me 2 (dy) ndeshje pezullim nga aktiviteti futbollistik.
- Lojtari i KF Skënderbeu, Sciprim Taipi, për sjellje josportive ndaj kundërshtarit, në bazë të Nenit 47/1/d të KDS dënohet me 1 (një) ndeshje pezullim nga aktiviteti futbollistik.
- Lojtari i FK Tomori, Orgest Gava, për sjellje josportive ndaj kundërshtarit, në bazë të Nenit 47/1/d të KDS dënohet me 2 (dy) ndeshje pezullim nga aktiviteti futbollistik.
- KF Luftëtari, për braktisjen e ndeshjes së vlefshme për Kupën e Shqipërisë kundër FK Elbasani, në bazë të nenit 54/1 të KDS dhe Nenit 109/2/a/c të Rregullores së Veprimtarisë Futbollistike humbet ndeshjen në tavolinë me rezultatin 3-0 dhe dënohet me mospjesëmarrje në sezonin pasardhës të Kupës së Shqipërisë.
