Kryeministri Edi Rama i ka drejtuar vazhdimisht thirrje naftëtareve të ndërpresin grevën e urisë dhe më pas ai është i gatshëm të ulet në bisedime me to përsa i takon kërkesave që kanë mbi pagat e prapambetura.
Ndërsa greva e urisë ka hyrë në ditën e 16 dhe gjendja shëndetësore e grave vijon të përkeqësohet, ato janë të vendosura të vijojnë edhe pse konfirmojnë se forca fizike e tyre ka shteruar tashmë.
Sërish naftëtaret ia janë drejtuar me një thirrje kryeministrit Edi Rama që të gjejë zgjidhjen, por jo që ato të lenë grevën.
“Nuk dalim që këtu. I bëjmë thirrje kryeministrit Rama, do dalim kur të marrim pagat e fituara me gjyq. Nuk negociojmë jashtë grevës se nuk kemi besim”, thonë ato.
Ditë pas dite Edi Rama i ka vendosur kushtin naftëtareve që të lenë grevën dhe më pas ai do shkojë vetë menjëherë për të negociuar, por vetëm pasi të plotësohet kushti.
Ndërkohë gratë kanë kërkuar një grup negociator që do diskutojë me kryeministrin, por nga ana tjetër ato të vijojnë grevën deri në zgjidhje.
