Kryeministri Edi Rama ka reaguar sërish për grevën e naftëtareve të Ballshit, të cilave u kërkon që ta ndërpresin pasi në të kundërt ai nuk mund të shkojë dhe ti takojë.
Duke iu drejtuar si “vëlla”, Rama shprehet se askush më shumë se qeveria e tij nuk kërkon që çështja e rafinerisë të zgjidhet, dhe gjithë të tjerët që shkojnë dhe vizitojnë naftëtaret, derdhin kot lot krokodili.
“Të dashura motra greviste të Ballshit! Askush nuk ju kërkon të dorëzoheni, qeveria nuk është armiku po aleati juaj dhe askush nuk ju ofron lëmoshë, ne jemi gati të qajmë hallin tuaj së bashku! E vetmja pengesë mes nesh është greva juaj. Mbyllni grevën dhe unë do jem aty menjëherë!
Mos u gënjeni nga krokodilët që lotojnë për ju e duan t’ju përdorin kundër qeverisë! Qeveria është e juaja, por nuk mund të bisedojë me ju nën presion e me ultimatume! Grevat bëhen për t’u dëgjuar, jo për të marrë me zor atë që ke në mendje. Ne ju kemi dëgjuar e po ju presim juve!”, shkruan Rama.
Ndërkohë naftëtaret janë shprehur se nuk e ndërpresin grevën e urisë, ndërsa i kanë bërë thirrje Kryeministrit që të takohet me to.
