Kryetari i Komisionit të Marrëdhënieve me Jashtë në Parlamentin Europian, David McAllister është shprehur se është ekstremisht i shqetësuar për faktin se mazhoranca ka planifikuar të kalojë nesër në seancën plenare, ndryshimet në Kodin Zgjedhor.
“Pavarësisht thirrjeve kombëtare dhe ndërkombëtare, që kërkojnë të pritet për opinionin e Komisionit të Venecias lidhur me ndryshimet në Kodin Zgjedhor, është vendosur që ato të votohen nesër”, shprehet McAllister në një postim në Twitter.
“Ndryshimet e njëanshme të marrëveshjes mund të përkeqësojnë situatën politike dhe të sjellin polarizimin e saj drejt zgjedhjeve të prillit të vitit 2021. Këto ndryshime do të jenë të dëmshme lidhur me konferencën e parë ndërqeveritare për hapjen e negociatave, në fund të vitit”, shton McAllister.
Ndryshimet e votuara nga mazhoranca dhe një pjesë e opozitës parlamentare u kundërshtuan nga opozita dhe u quajtën shkelje e marrëveshjes së 5 Qershorit. Presidenti Ilir Meta i ktheu për rishqyrtim në Kuvend, ndërsa kërkoi opinionin e Komisionit të Venecias.
Komisioni ka bërë me dije se do ti shqyrtojë në dhjetor. Ndërkohë, kryeministri Edi Rama, deklaroi se do ta rrezojnë dekretin e Metës, edhe pse përfaqësues të BE-së kanë apeluar që para votimit në Kuvend të pritet opinioni i “Venecias”.
Ditën e nesërme, në kalendarin e seancës plenare është futur për votim dekreti i Metës që ktheu në Kuvend ndryshimet e njëanshme të Kodit Zgjedhor.
