Greva e urisë së grave naftëtare në Ballsh ka hyrë në ditën e 14, ndërsa gjendja shëndetësore është rënduar. Ndërkohë që mungon zgjidhja me komunikimi me Qeverinë, Kryeministri Edi Rama ka zgjedhur t’i drejtohet grevisteve të urisë me një mesazh në rrjetet sociale, ku i kërkon ndërprerjen e grevës dhe nisjen e bisedimeve.
“Të dashura greviste të Ballshit, është e drejta juaj të mos dilni nga greva, por është e pamundur të ulemi bashkë me presione e ultimatume! Jam gati të vij tek ju sapo të mbyllni grevën e të flasim si do mundemi t’ju ndihmojmë për këtë hall që nuk e ka krijuar qeveria.
Ne po punojmë për të gjetur investitorë seriozë që të rindezin rafinerinë edhe pse greva juaj nuk ndihmon as për këtë! Ndërsa për ndihmën e mundshme shtetërore ndërkohë, meqë ju s’pranoni as të dilni në asistencë, ka vetëm një rrugë: Mbyllni grevën dhe ulemi qajmë hallin!”, shkruan Rama.
Ndërkohë grevistet i kanë kërkuar Kryeministrit të shkojë në Ballsh dhe të bisedojë me to, ndërsa nuk kanë pranuar të ndërpresin grevën.
