Floresha Rasha dhe fëmijët e saj Amar Rasha, Emel Rasha dhe Hatixhe Rasha si edhe djali i familjes Dumani, Endri, raportohet se janë transportuar në Beirut nga kampi Al Hol në Siri. Ata pritet të udhëtojnë nesër drejt Shqipërisë.
Kryeministri Edi Rama, nga Libani, foli dhe për një tjetër shqiptare të ndodhur në kampin që drejtohet nga kurdët dhe ku mbahen të burgosur ata që dikur kanë qenë pjesë e grupit militant Shtetit Islamik ose familjarë të tyre.
Për motrën e Endrit, Eva Dumanin, Rama tha se ajo është mirë, por situata është më e komplikuar, duke mos dashur të japë më shumë detaje: Eva është mirë, por janë të komplikuara informacionet.
Ndërsa për gjendjen e Floresha Rashës, kryeministri u shpreh: “E ëma e fëmijëve të vegjël është në gjendje të vështirë ka plagë në trup, por do vij me ne. E rëndësishme se ky operacion i hap rrugën fazës vjetër”.
Konsulli i Shqipërisë në Liban, Marc Ghorayeb tha po ashtu për “Top Channel” se do të punohet për riatdhesimin e të gjithë personave që janë në ato kampe të tmerrshme.
Shefi i Antiterrorit Gledis Nano i cili tregoi se ka qëndruar 4 javë në Liban, e cilësoi kampin Al Hol, si kampin e “ferrit”.
Pamjet e publikuara nga Gjysmëhëna e Kuqe siriane, që është angazhuar në operacionin për nxjerrjen nga kampi të gruas dhe fëmijëve shqiptarë.
