Partia Demokratike ka reaguar mëngjesin e sotëm lidhur me një video të postuar nga Kryeministri Edi Rama mbi punimet që po kryhen në Unazën e Madhe dhe devijimin e trafikut në nyjen e sheshit Shqiponja.
Përmes një postimi në rrjet, Dorjan Teliti shprehet se tmerri i trafikut në unazën e re i shtohet aferës 48 milion euro taksa të shqiptarëve për 2.2 kilometra rrugë
“Për qytetarët që u duhet të dalin apo të hyjnë në Tiranë fillon tmerri i vërtetë i trafikut. Tmerri i trafikut i shtohet historisë mafioze të korrupsionit ndërkombëtar të ER, Damian Gjiknurit dhe DH Albania.
48 milion euro i ka taksur ER dhe Damian Gjiknuri shtrimit të asfaltit në një segment vetëm 2.2 km të gjatë. Të tre lotet e projektit u fituan pa garë me pothujase 100% të vlerës limit të tenderave, ku gjithmonë merrnin pjesë 2 firma dhe njëra nuk jepte ofertë financiare”, thekson Teliti.
Sipas tij, historia mafioze e Unazës së Re ngrihet mbi dramën e qindra familjeve që mbetën pa strehë për të mos prekur projektin e kullave të Edmond Begos.
“Një aferë ndërkombëtare 48 milion € që u mbyll me vetëm një të dënuar, një recepsionist 26 vjeçar që u bë kurban për një grusht para”, shkruan Teliti.
Ndërkohë Kryeministri Edi Rama në postimin e tij me video shkruante “dhe me këtë video informuese mbi planin menaxhimit të🚦trafikut që nis sot në nyjen e SHESHIT SHQIPONJA, për shkak të punimeve që po kryhen në Unazën e e Madhe të Tiranës, të cilën për 3 vite e bllokuan ata që i lanë rrugët rrugëve”.
